Грамота сургутскому воеводе Федору Головину о мерах по строительству г. Томска

От царя и великого князя Бориса Федоровича всеа Русии в Сибирь, в Сургуцкой город, Федору Васильевичю Головину.

• По нашему указу велено вверх по Оби на реке на Томи в Томской волости поставить город. А для городового ставленья велели есмя послати из Сургута Гаврила Писемского да ис Тоболска Василья Тыркова. А что велено послати их, и сибирских городов служивых людей, и тотар, и остяков, и хлебных же запасов, и наряду, и зелья, и свинцу, и сукон, и вина, и солоду, и хмелю, и тому послано к вам роспись за дьячьею приписью. И как к тебе ся наша грамота придет, а ис Тоболска тоболских, и тюменских, и пелымских служивых людей, и из Березова татар и остяков, и наряд, и зелье, и свинец, и хлебные запасы, и сукна в Сургут воеводы и головы пришлют, и ты б тотчас отпустил из Сургута в Томскую волость Гаврила Писемского да Василья Тыркова, а с ними служивых людей по росписи. А будет ис Томские волости Гаврило Писемской да Василей Тырков учнут к тебе писати о запасех и о людех, и ты б к ним по их отпискам посылал, смотря по тамошнему делу, чтоб в том служивым людем нужи не было, а однолично б еси Гаврила Писемского и Василья Тыркова со всеми служивыми людми и з запасы отпустил из Сургута в Томскую волость, не измешкав, чтоб им дойти въскоре водяным путем и город поставити, и служивым бы людем и тотаром, которым велено, отпустить назад, не зазимовать. А как Гаврила и Василья в Томскую волость отпустишь, и в котором числе, и что у них в Томской волости учнет делатца, и ты б о том отписал к нам к Москве и велел отписку отдати в приказе Казанского и Мещерского дворца диаку нашему Нечаю Федорову.

Писано на Москве лета 7112-го марта в 23 день.

• РГАДА. Ф. 214. Кн. 1. Л. 137 об. –139. Копия.

• Воспроизводится по:

• Первое столетие сибирских городов. XVII век. Новосибирск, 1996. С. 38.